Acts 4

Ala Bitrus Wan N Yohanna Yi

1Amma sanu ɓa ɓei zhi ɓai daɓo na zayi nyi, a priest a dan-doka aduwa nyakun nya, n Assadukiyayi ɓa ɓe da ɓa. 2Ɓa gyi minagyi, Nge Bitrus n Yohanna yi ɓa fa waʼazi zhin Yesu kala-ka nya evingwo. 3Ɓa wan ɓa, ɓa ku ɓa gu fi n kurkuku, har efye a gyi. 4Amma aza nɓa ɓei wo Bitrus waʼazi nyi ɓa ga gaiciya. A Yesu viyi ɓa ku mwa begye har aza ɓa ku sun 5,000 (dubu ngun atnu).

5A ɓeye ɓo zhin, a Yahudiyi atukwoda, ɓai ye zhi n Urishelima n sayi. 6Annas Pirist dnagmayi ɓo nyi n Kayafa yi, Yohanna, Alekzanda n na zajeyi n ɓa nyi n prist bwa. 7A ɓe n Bitrus n Yohanna yi n ɓa ʼbye. Ɓa nya ɓa ge, “Fya bwa iko n na? Nyika ga fye izni fyei zhin ɓeyeʼa?”

8Bitrus n nunuyi n Zafun Gyi-gyi yi wa gna, “Eyi abye atukwoda dnagmayi. 9Fye daɓe manayi ye nu n na zhin zabmazhi nyi? 10Ya zhin deye dna Yesu ye nu, Wo nu zhin Kristi n fye ɓo zundu nyi. Amma Shekwoyi ɓei la wye-wyei gawo, owo iko na zhin ce, ko kunce lo fya kpe lo nu. 11Yesu Masihu nu n na daɓo ge, kuta n na nyamiyi na ko aɓo, oko nu la ze kuta kusurwa nya. 12Gni-gni to lo n na babaho yin, n Eshe sinta, eye do to lo n aza ɓa yi ɓa pwo nkwo aba m.”

13Shi ɓa ɓo gye Bitrus n Yohanna yi n bugba kala yi, ce a wo ɓa ntuge ɓa to zhin aza nu nɓa zhin makaranta m. Amma ɓa gye n sayi ge ɓa ɓo ku gnisun n Yesu yi. 14A shaula zhin yi to ɓo mi, ɓa na zabmazhi kagna ɓo m, ntu ge wo ɓo gni ɓo n wohin. 15Ɓa kun ɓa ya zhi ebmi.

16Ɓa nya aje ge, “Yi ɓa zhin wuna naza deye yiʼa? Yi ta mi ya na aɓo wo-woyi ye ɓom, aku ce kpe n Urushelima vinya. 17Amma yi ɓa mi ya hana nɓai to ɓa gyi abye m, ɓa ku ce pi. Ko kwa ɓa sin wahala.” 18Shi ɓa ɓo ku da lonu ɓa yi ɓa, ɓa gna ʼfye to je nyaho da tu n Yesu tukwon.

19Bitrus n Yohanna yi ɓa gna ge, fye gna yi kwo Shekwoyi ye ya vi oza ɓena nu kwo owo nya! 20Yi ta mi ya fa aɓo wo-woyi da ɓo, na yi ɓo gye Yesu woi zhin woi da njesun nyi m.

21A shaula zhinyi to ɓo mi ɓa ta ɓa m. Amma ɓa gna kni ɓa, ɓa fa ɓa lo. Ɓa ɓo gna ɓa ta ɓa, wahala ɓei ɓa laka, ntuge aza ɓo ci Shekwoyi ntu aɓo wo-woyi ɓo. 22Zabmazhi ye ɓo ku aye bwa ngun-shinyi.

23Bitrus n Yohanna yi ɓa kuka ɓa lo ɓa da abara je enya n ko ku zhin.

Aduwazhin N Latu Yi

24A Yesu viyi vinya ɓa yezhi, Ɓa zhin aduwa. Ɓa gna “O Dagayi n ha zhin eshe n ʼkni, a nuwan yi, n anya yi vinya n ɓa fi n ɓa nyi. 25– 26Sapai ho ɓo da ɓo eyi zakwoyi gbe Esu Dawuda, she Zafun Gyi-gyi-yi ɓei wu wo. Knihi nu zhin abyedo gyi minagyi n Dagayi, amama ɓai pa kulu tu Shekwoyi dnagmayi tukwo a? Asu anyi nya ɓa ku gbe gun ntu ge ɓa sun kun n Shekwoyi Nugun yi!

27“Enya nu n kwa zhin n naiye! Hirudus n Bilatus gwamna yi ɓedo n a Israilayi yi ɓa la ʼgbe dnado gabna n Shekwoyi nugun yi, oho nugun kni-kniyi, oho fyenu gyi-gyi-yi. 28Ɓa ta fa ɓo zhin ɓo n ho iko ye ɓa zhin. 29O Dagayi wo ɓa shaula nukwoyi, ha ga ho a fyenubugba kala ɓa zhin waʼazi. 30Tnu ho iko kagna nya yi, fa ya zhin aɓo wo-woyi dna n Yesu eye, oho fyenu gyi-gyi-yi.”

31Shi ɓa ɓei zo aduwa zhin, nyakun kwa shan-shan, oɓa vinya ɓa nu n Zafun Gyi-gyi-yi ɓa zhin waʼazi ntna edna.

32A Yesu viyi bugba vinya ɓei nyi gmanyi nu. Ozaho-zahoi to ɓo shi nyanyaho yi n wo gmanyi ɓo nun, ɓa ɓo ce ga aje.

Aɓozhin-zhin Ngun Aba Tu Gyiwye Tukwo

33Abara ɓa zhin waʼazi Yesu kalala nya evingwo. Zumunta ɓei nyi nna a Yesu viyi mi dei-dei. 34– 35San-gyi to ɓe nyi nɓa ba m. Ntu ge afwaiza ɓei ku oɓa afan kun ɓa ɓe nagyiwye yi n abara aba, ɓa zhin ampanyi cei gnisun.

36Misali Yusufu (aje wo yi nugun waʼazi zhin yi) wo bi Saiprus wo zhin Levi bye nu. 37Wo ɓei la owo fwa knu, wa ɓe nnagyiwyei n aba, a gna aza n ɓa gyisan nyi.